Rasim Musabəyov: "ABŞ Dövlət katibi müavininin səfəri müharibə ehtimalı ilə bağlı deyil"

04 Fevral 2010 

Politoloq Rasim Musabəyov "Stratfor" Araşdırma Mərkəzinin və ABŞ Milli Kəşfiyyat İdarəsinin rəhbərinin Dağlıq Qarabağda silahlı münaqişənin yenidən alovlana biləcəyi barədə açıqlamalarını şərh edib.

Politoloq Milli.Az xəbər portalına açıqlamasında bildirib ki, "Sratfor" Amerika kəşfiyyatına yaxın bir tədqiqat mərkəzi sayılır. Ona görə də onların yaxın mövqedən çıxış etməsi gözləniləndir.

"O ki qaldı ABŞ Dövlət katibinin müavini Ceyms Steynberqin Cənubi Qafqaza səfərinə, bunun hansısa müharibə ehtimalının gündəlikdə dayanması ilə bağlı olduğunu düşünmürəm. Çünki Steynberq həm Ermənistanda, həm Gürcüstanda görüşlər keçirəcək. Regionla bağlı müzakirə olunası çoxlu məsələlər var" - deyə politoloq bildirib. 

Xatırladaq ki, son günlər ABŞ-ın Strateji Araşdırma Mərkəzi "Stratfor"un siyasi şərhçisi Marko Papiç və ABŞ Milli Kəşfiyyat İdarəsinin rəhbəri Denis Bler Dağlıq Qarabağda silahlı münaqişənin yenidən alovlana biləcəyi barədə açıqlama veriblər. Fevralın 4-5-də isə ABŞ Dövlət katibinin müavini Ceyms Steynberq təhlükəsizlik məsələsini prezidentlər səviyyəsində müzakirə etmək üçün Cənubi Qafqaza səfər edib.

"Bir tərəfdən biz  həmişə narahatıq və böyük dövlətlərə deyirik ki, Qarabağın işğalı ilə əbədiyyən barışacağımızı düşünməsinlər. Çalışırıq ki, Minsk Qrupunun həmsədr ölkələrində bir narahatlıq yaransın, hərəkətə keçsinlər. Onlar hərəkətə keçəndə isə fikirləşirik ki, görəsən, bunun arxasında nə dayanır?" - deyə R.Musabəyov əlavə edib.

Politoloqun fikrincə, əvvəllər elə başa düşülürdü ki, Azərbaycan rəhbərliyinin müharibə ilə bağlı sərt açıqlamaları daxili auditoriyaya hesablanan ritorikadır: "Amma sonra ordu quruculuğundakı ciddi işləri, müəyyən sistemli hazırlıqları görəndə, bu açıqlamaları ciddiyə almağa başladılar. Anladılar ki, doğrudan da Azərbaycan Qarabağın işğalı ilə barışmayacaq" - politoloq əlavə edib.

R.Musabəyovun fikrincə, həmsədr ölkələr Ermənistanı özlərinə daha yaxın hesab edirlər, ona görə də özümüzü aldatmaq lazım deyil: "Həmsədrlər danışıqlarda ermənilərin bütün iddialarının olmasa da, əksəriyyətinin təmin olunmasına, bu münaqişədən onların daha qazanclı çıxmasına nail olmağa çalışırlar. Azərbaycan da razılaşmır deyə, münaqişə bu günə qədər həllini tapa bilmir".

Türkiyənin baş naziri Rəcəb Tayib Ərdoğanın son günlərdə həmsədr ölkələrin ünvanına sərt ittihamlarını şərh edərkən politoloq bildirib ki, Ermənistanın cılız və dilənçi bir dövlət olduğu hamıya bəllidir: "Həmsədr ölkələr bir tərəfdən işğalçı Ermənistana maliyyə yardımı edir, silah verir. Digər tərəfdən deyirlər ki, biz Ermənistana təzyiq edə bilmərik. Türkiyənin də, Azərbaycanın da tələbi budur ki, böyük dövlətlər regionda daha pis nəticələrin yaranmasını istəmirlərsə, əllərində olan bütün təzyiq imkanlarından istifadə edib Ermənistanı öz yerində oturtmalıdırlar. Əks halda, onların arzulamadıqları ən pis variantlar baş verə bilər və bundan hamı zərər görəcək". 

Dağlıq Qarabağ münaqişəsi ilə bağlı danışıqların son raundu barədə fikirlərini bölüşən
R.Musabəyov bildirir ki, hazırda söhbət çərçivə müqaviləsindən gedir və burada detallar yox, ümumi məsələlərin razılaşdırılması gündəmdədir: "Yəni, Ermənistanın işğal etdiyi torpaqlardan çəkilməsi bildirilir, amma bunun nə vaxt, necə və hansı formada olacağı göstərilmir. Bu isə məsələnin daha da uzadılması deməkdir. Ermənilər isə qorxur ki, bu gün çərçivə müqaviləsinə imza atsalar, sabah da onları konkret addımlar atmağa məcbur edəcəklər. Odur ki, imzalamırlar. Belə vəziyyət böyük dövlətlərin maraqlarına cavab verir. Amma münaqişənin həlli prosesinin uzadılması Azərbaycana sərf etmir. Bizə işğal olunmuş torpaqlarımız lazımdır, kağız parçası yox!" - deyə Musabəyov qeyd edib.

Milli.Az